تكوين

فكرك أنا لو ما كنتْ ..

يعني إنتْ بتكون؟!

يالغارق ببير العدمْ

و ما مرقوا سيّارة بحلمْ

حتى الكواكب و النجمْ

لو ما بكتبلك شِعرْ

ما بيكتمل هالكونْ ..

فكرك أنا لو ما كنت

يعني إنت بتكونْ ؟!

….

يا موسى .. يا ابن المدى

واديك ما داسو حدا

قلبي أنا واديكْ ..

من خلفْ طُور الصّمتْ

شُو تعبتْ تَا ناديكْ ..

و شعَّلتْ قلبي نارْ

تَتِلْمَحو بعتْمكْ

و لوْ كنتْ ابنْ نهارْ

رحْ ينطفي نجْمكْ

و يبقى غسقْ هالروحْ

و التينْ و الزيتونْ

فكرك أنا لو ما كنتْ

يعني إنتْ بتكونْ ؟!

…

يُونسْ .. يَ رْفيق البحرْ

شطَّك أنا و الموجْ

عرّش على كِتف العِمر

ريحان .. و نارنجْ

عم ينطروا ينبت شعرْ

عَ مْسامْ متْل الْمرجْ ..

تا اِقطفكْ وحدي أنا

آويكْ.. يا ذي النون

فكركْ أنا لو ماكنتْ

يعني إنت بتكونْ ؟!

…

أيّوب .. يا بَيّ الصّبرْ

أعطيني مِنْ صبركْ

تا اِحملكْ باقي العمرْ

ما اشكي منْ قهركْ

كلْمَا انْكسرْ دف الشّعرْ

بسْرق نبض صدركْ

بعطيه من صوتي عِطرْ

و بْينخلقْ موزونْ

فكركْ أنا لو ما كنتْ

يعني إنتْ بتكونْ؟!